Brigada Balaod

Cebu 600 Challenge

Niadtong Sabado, October 26, 2019, gipahigayon ang 2019 Cebu 600 Challenge, usa ka motorcycle riders’ event diin ang target mao ang paghuman sa 600 ka kilometro gikan sa Cebu City, ngadto sa Santander, Moalboal, Balamban, balik sa Cebu City (via Transcentral Highway), Danao City, Daanbantayan, unya balik sa Cebu City via Transcentral Highway na pod.

Ang “mananaog” sa maong challenge mihuman sa ruta sulod lamang sa 5 ka oras ug 55 ka minutos, sa ato pa, nag-average og 101.35 kph, klaro nga labaw sa speed limits sa atong kadalanan ug mas tataw nga unsafe speed sa daghan kun di man kadaghanang sitwasyon.

Matod pa sa Sec. 35 sa R.A. No. 4136, ang speed limit sa mga motorsiklo mao kining mosunod: sa open country roads, walay blind curve, ug walay kabalayan – 80 kph; sa mga through streets o boulevard, nga walay traffic, ug walay blind curve – 40 kph; sa mga kadalanan sa lungsod ug dakbayan, nga pipila ka mga sakyanan (dili through street) – 30 kph; sa mga crowded street, o may blind curve, school zone, o kon dunay sakyanan nga nag-urong – 20 kph.

May mga exception sa Section 35, apan wala maapil dinhi ang mga event sama sa Cebu 600 Challenge.

Sa ato pa, klaro ug tataw nga ang “mananaog” sa Cebu 600 Challenge naka-violate sa provisions sa Section 35 sa R.A. No. 4136. Ang penalty niini P100 ra nuon.

Una kong nasugatan ang pipila ka mga partisipante sa maong event didto sa Catmon, Cebu, mga 6:30 A.M., kay padulong ako sa Lapu-Lapu City naghatod og order nga letchon. May pipila kanila nga dili mobalik sa ilang lane bisag kapila pa nimo i-flicker ang imong suga, maong mapugos na lang kag swerve sa tuo, alangan na mag mobangga ka. Ang tua sa tuo nimo ang magkapuliki intawon og lihay pod nimo, kay basig masabdan.

Pag-uli nako gikan sa Lapu-Lapu, didto na pod ko naabti sa Danao sa pipila kanila. Sa maong grupo, daghan kaayong mi-overtake sa right lane, nga gidili gyod unta.

Sa akong opinyon, ang kadalanan sa Cebu wala gihimo alang niining klase sa event. Kon pasagdan ni, di magdugay duna gyod unyay inosenting non-rider nga mamatay tungod ning maong event. Ang atong kadalanan gihimo alang sa kadaghanan, dili alang sa pipila nga walay nakitang problema sa paghuman sa 600-km nga ruta sa kinaubsang oras, bahalag wala masunod ang speed limits, traffic rules, ug basic road courtesy.

Read: Cebu 600 Challenge (Part 2)

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.