Brigada Balaod

CJ Bersamin, salamat!

Karong adlawa, Oktubre 18, 2019, mao ang ika-70 nga kasumaran sa adlawang natawhan ni Chief Justice Lucas Bersamin. Sa pagtungtong niya sa edad nga 70, karon ang mandatory retirement niya gikan sa judiciary. Onse siya ka buwan isip Chief Justice, ang kataposan niyang position sa 33 ka tuig nga pagserbisyo sa hudikatura.

Si CJ Bersamin migradwar sa abogasya gikan sa University of the East College of Law (Manila) niadtong 1973, ug ika-9 sa bar examinations sa maong tuig, sa grado nga 86.3%. Nag-private practice siya sa 12 ka tuig, hangtod nga gi-appoint isip regional trial court judge sa Quezon City niadtong 1986 ni Pres. Cory Aquino. Sa tuig 2003 (Pres. Gloria Macapagal-Arroyo), misaka siya sa Court of Appeals. Niadtong Abril 2009 (GMA  gihapon), gitudlo siya sa Supreme Court isip associate justice.

Usa siya sa mibotar pabor sa pagtangtang via quo warranto kang Chief Justice Maria Lourdes Sereno niadtong Mayo 11, 2018. Human minaog sa pagka Chief Justice si Teresita De Castro nga misunod ni Sereno, miasumer si CJ Bersamin Nobiyembre 28, 2018.

Isip justice sa Supreme Court, si CJ Bersamin maoy misuwat sa ruling nga nag-acquit kang Arroyo sa plunder, sa desisyon pagpa-pyansa kang Juan Ponce Enrile, ug sa desisyon pagdeklara nga unconstitutional sa pipila ka fund releases sa Disbursement Acceleration Program sa administrasyong B. Aquino. Mipabor usab siya sa pagpalubong kang kanhi Pres. Ferdinand Marcos sa Libingan ng mga Bayani, sa padayong pagpriso kang Senador Leila de Lima, ug sa mga extension sa martial law sa Mindanao.

Sa iyang farewell dinner niadtong Oktubre 11, 2019, buot ni CJ Bersamin nga mahinumdoman isip “healing chief justice.”

Tinuod baya pod. Sa hapit motuig nga pagdumala ni CJ Bersamin, inanay nga nabalik sa normal ang judiciary, nga nagubot sa nahitabong pagtangtang kang CJ Sereno.

Daghang salamat sa imong serbisyo sa hudikatura CJ Bersamin. Best wishes sa imong retirement!

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.