Brigada Balaod

Enrile plunder update

Karong adlawa expected nga mobalik pagsugod ang hearing sa plunder case ni kanhi senador Juan Ponce Enrile didto sa Sandiganbayan. Kahinumdoman, niadtong September 2013, gipasinganlan si Enrile nga apil sa pork barrel scam nga giingong gipasiugdahan ni Janet Napoles. Niadtong Hunyo 2014, gipasaka ang kaso sa Sandiganbayan, ug giingong si Enrile nakadawat og P172 milyones nga kickback. Gibilanggo si Enrile Hulyo 3, 2014, apan gipapyansa sa Supreme Court pagka Agosto 2015. Co-accused ni Enrile sa maong kaso ang iyang kanhi Chief of Staff Gigi Reyes ug si Napoles mismo. Ang duha wala tugoti nga makapyansa.

Motuo mog sa dili, bisan kon niadto pang Hunyo 2014 gipasaka ang kaso, karon lamang tuiga nakasugod pag-present og ebidensya sa main case ang prosecution.

Gani, dili pa tataw kon madayon ba gyod ang pagpresentar og ebidensya sa prosecution karong adlawa, o duna na poy laing motion nga ipasaka ang kampo ni Enrile o sa iyang mga co-accused.

Sa mga interesado sa dagan sa atong mga korte, ang kaso ni Enrile classic case sa paggamit to the max sa Rules of Court aron mapadugay ang pagdagan sa kaso.

Hunyo ug Hulyo 2014 pa lang,  mi-sumiter na si Enrile niining mga motion: (1) motion to dismiss for lack of evidence on record to establish probable cause; (2) ad cautelam motion for bail; (3) opposition to the issuance of warrant of arrest; (4) motion for dismissal of information; ug (5) motion for a bill of particulars. Ultimately, ang denial sa motion for a bill of particulars miabot sa Supreme Court, nga mi-overturn sa Sandiganbayan.

Dayon misunod ang bail hearings, diin pulos gi-deny sa Sandiganbayan ang mga petition for bail. Apan ang kang Enrile misaka ngadto sa Supreme Court ug gitugtan siya nga makapyansa.

Niadtong Disyembre 2018, gi-set na gyod sa Sandiganbayan ang hearing para sa main case, Pebrero 2019. Apan niadtong Pebrero 2019, si Enrile misumiter og motion aron i-produce sa prosecution ang material evidence nga gihuptan nila. Kini gi-allow sa Section 10, Rule 116 sa Revised Rules of Criminal Procedure. Ang katuyoan mao nga makapangandam ang akusado sa pagdepensa sa iyang kaugalingon – kabahin kini sa katungod sa akusado. Gitugtan kini ug maong na-reset na pod ang hearing.

Ambot kon kanus-a pa kini mahuman ang kaso batok ni Enrile. Mag-96 anyos na si Manong Johny karong Pebrero 14, 2020, ug segurado akong di pa ni mahuman ang iyang kaso anang panahona. Siya mismo miingon nga gusto niyang makita ang kahumanan sa iyang kaso sa dili pa siya mopanaw, apan kon i-convict gyod siya sa Sandiganbayan, pwede pa siya moapelar sa Korte Suprema.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.