Brigada Balaod

Pagdili sa pagbalita sa suicide

Nanawagan si Cebu City Councilor NiƱa Mabatid sa media sa Sugbo nga dili lang ibalita ang kabahi sa pagpakamatay kun suicide. Kini, matod pa niya, aron malikayan ang pagkonsidera sa mga bata sa suicide isip solusyon sa ilang giatubang nga mga problema.

Ang pagdili sa pagpublikar sa mga balita kabahin sa suicide kun paghikog usa ka porma sa prior restraint. Hinuon, resolusyon man lang usab ang kang Mabatid, ug dili ordinansa; maigo kining hangyo lang sa mga taga media, ug dili pagsugo kanila.

Ang freedom from prior restraint nagpasabot nga ang kagamhanan gidid-an ning mosunod: (1) pagpangayo sa permiso sa kagamhanan aron ipublikar ang usa ka butang; (2) lisensya o permit sa dili pa ang pagpublikar, lakip na ang mga license taxes; (3) injunction kun order sa korte aron dili ipadayon ang publikasyon. Hinuon, dili kini absolute.

Sa pag-ila kon permitted prior restraint ba ang gihimo sa gobyerno, atong tan-awon kon kini content-neutral regulation ba (wala mag-agad kon unsay sulod nga mensahe sa publikasyon) o content-based regulation (ma-restrict o dili binase sa sulod nga mensahe sa publikasyon). Ang mga pananglitan sa content-neutral regulation naglakip sa pagdili sa pag-camp (lakip isip protesta) sa usa ka national park (kay pagseguro man lang kini nga walay daotang mahitabo sulod sa park), o ang pag-require og permit sa usa ka rally (kay pagseguro man lang kini nga andam ang kapolisan pagresponde sa alarma), o ang pag-require og prangkisa alang sa broadcast (tungod kay limitado ang broadcast spectrum).

Apan kon content-based gali, sama sa sugyot ni Mabatid, gikinahanglan ipakita sa gobyerno nga may clear and present danger aron pugngan ang pagbalita. Dinhi maka-violate ang maong sugyot kon himoong ordinansa.

Dili kini pag-ingon nga dili problema ang mga panghitabo nga hikog sa atong mga kabataan. Apan may laing paagi pagsulbad sa maong problema. Ang unang lakang niini mao ang pagsabot ning maong problema.

Alang niadtong buot mosabot sa problema sa suicide ug uban pang mental health problems, bisitaha ang Mental Health Expo nga adto ipahigayon sa Ayala Center Cebu Activity Center isip pagselebrar nato sa World Mental Health Day karong adlawa.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.