Uncategorized

Pangutana ug tubag

Sa miaging duha ka semana, nabasa ninyo kining atong lindog. Ubay-ubay pod ang mipadangat sa ilang mga pangutana, nga atong gipaninguha nga matubag. Ani ang pipila ka pangutana ug tubag.

P1: Nag-abang mi sa balay sa tulo ka tuig, walay pinermahang kontrata, binuwan ang bayad. May one month deposit mi ug one month advanced. Karon giingnan mis tag-iya nga tapos sa buwan na lang mi kay iyang ibaligya ang yuta nga gitukoran sa balay. Mapapahawa ba mi? Unsay angay namong buhaton?

T1: Mapapahawa gyod mo kay iya man nang balay. Matod sa balaod, kon walay kasabotan unsay termino sa kontrata sa pag-abang, depende sa pagbayad. Kay binuwan man, nan matapos ang kontrata inigkahuman sa buwan. Pwede mong papahawaon human sa buwan. Hinuon, kon di mo mopahawa, dili pod mo pwede guyoron paggawas. Gikinahanglan mo-file og Unlawful Detainer sa Municipal Trial Court ang tag-iya sa balay. Kon makita sa korte nga balido ra nga papahawaon mo, orderan mo nga mopahawa, ug mobayad sa binuwang abang samtang wa pa mo mopahawa.

P2: Wala ko maka-attend sa team building sa among company kay gasuol ang akong tiyan. Karon gisuspenso ko og tulo ka adlaw. Makiangayon ba Atty.?

T2: Depende na sa patakaran sa inyong kompanya. Kon ang wa pagkuyog sa company activity gi-consider nga serious offense (ug pwede gyod ni ma-serious offense) nan makiangayon ra nga gisuspenso ka sa tulo ka adlaw. Mahimo nimong questionon ang imong pagkasuspenso adto sa Regional Arbitration Branch.

P3: Mapapahawa ba si yuta nga iya sa gobyerno kay nabaligya na kuno ngadto sa mopapahawa namo?

T3: Tan-awa unsa nga dokumento ang gikuptan sa mopapahawa ninyo. Kon balido kini, nan nabaligya gyod nang yuta ngadto nila. Busa mapapahawa kamo.

P4: Upat na ka tuig human namatay ang akong papa. Maka-claim pa ba mi sa death benefits niya sa SSS?

T4: Kon qualified ka nga benepisyaryo, walay prescription ang pag-claim sa death benefits. Hinuon, kon duna nay nahitabong pag-claim, alang sa re-adjudication, 10 years ra gikan sa initial settlement.

P5: Pilay pyansa sa psychological child abuse?

T5: Ang psychological child abuse violation sa Section 10(a) sa R.A. No. 7610, nagdala sa silot nga prision mayor minimum period, o 6 ka tuig 1 ka adlaw ngadto sa 8 ka tuig. Ubos sa Bail Bond Guide 2018, tag P10,000 per tuig sa maximum penalty, o P80,000.00.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.