Brigada Balaod

Ang katungod sa illegitimate children

Laing importanteng kaso nga nag-ung-ong karon sa Korte Supreme mao ang Aquino v. Aquino. Kini kabahin ni Amadea Angela “Maggie” Ho Aquino. Ang petisyoner ning maong kaso natawo niadtong Oktubre 8, 1978, siyam ka buwan human mamatay ang iyang amahan nga si Arturo. Matod niya, ang iyang amahan ug ang iyang inahan nga si Susan magpakasal unta, apan namatay si Arturo nga wa kini mahitabo. Busa, wala gyod maila isip lehitimong anak (anak sulod sa kaminyoon) si Amadea. Apan nagdako siya sa pamilya sa iyang amahan, ug gani giila gayod isip apo ni Miguel, ang amahan ni Arturo. Apan human sa kamatayon ni Miguel, ang iyang mga uyoan (mga igsoon ni Arturo) dili buot nga manunod siya sa kabtangan ni Miguel, bisan pa man kon duna kunoy kasugoan si Miguel nga hatagan og 2,000 metro kwadrado nga luna si Amadea.

Sa Regional Trial Court, midaog si Amadea. Apan gi-reverse kini sa Court of Appeals, ug maong naabot sa Korte Suprema ang kaso. Karon, dako kaayo kinig epektong kasoha kay may dakong posibilidad nga ang Korte Supreme modesider sa maong kaso pinaagi sa pagdesider nga wala mahisubay sa Konstitusyon ang Artikulo 992 sa atong Civil Code.

Kining Article 992 sa Civil Code nagkanayon: “An illegitimate child has no right to inherit ab intestato from the legitimate children and relatives of his father or mother; nor shall such children or relatives inherit in the same manner from the illegitimate child.” Matod pa, ang usa ka anak sa gawas (di-lehitimo) walay katungod nga manunod gikan sa lehitimong mga anak ug paryente sa iyang amahan o inahan, ang mao usab nga mga lehitimong anak ug paryente dili usab makapanunod sa illegitimate child.

Wala ni magpasabot nga dili makapanunod sa iyang amahan o inahan ang illegitimate child. Ang buot ipasabot sa Article 992, ang usa ka illegitimate child, dili makapanunod sa legitimate parent sa iyang parents (sa ato pa, iyang apohan).

Ako mismo pabor sa pagdeklarar sa Korte Suprema niining maong artikulo isip wala mahisubay sa Konstitusyon. Para nako, wala man goy igang basehanan ang pag-differentiate sa legitimate ug illegitimate children ubos aning maong artikulo.

Alang niadtong moingon nga angayan lamang gayod nga lahi ang pagtan-aw sa mga legitimate children kumpara sa illegitimate children, kay lagi ang legitimate children diha gayod sulod sa kaminyoon, kining maong artikulo mohatag pog kiwaw nga sitwasyon: kon pananglitan ning kaso sa mga Aquino illegitimate child pa ni Miguel si Arturo, makapanunod si Amadea.

Naa ra gyod sa Supreme Court unsay himoong desisyon aning maong isyu. Ako nanghinaot nga ilang  ideklara nga unconstitutional ang Article 992.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.