Brigada Balaod

Ikaupat nga termino?

Niadtong Septiyembre 10, 2019, mipahibalo ang Korte Suprema nga ang “ikaupat” nga termino ni Edgardo Tallado, gobernador sa Camarines Norte, balido. Kining kasoha usa sa labing init nga kaso nga angay sundan karon niadtong mahiligon sa balaod.

Ang atong Konstitusyon nag-ingon nga term of office sa mga elected local officials (lakip ang gobernador sa usa ka probinsya) tagtulo ka tuig, ug nga ang usa ka opisyal dili maka-serve og labas sa tulo ka nagsunod (consecutive) nga termino. Makita kini sa Section 8, Article X.

Sa kaso ni Gov. Tallado, napili siya isip gobernador sa mga piniliay sa 2010, 2013, ug 2016. Niadtong Oktubre 2015, gisuspenso siya sa Ombudsman sulod sa usa ka tuig. Apan gipili gihapon siya sa mga botante pagkagobernador sa eleksyon sa 2016. Niadtong Marso 2018, gi-dismiss siya, apan gi-reinstate ra pagka Oktubre 2018. Sa eleksyon sa 2019, mi-file siya og certificate of candidacy (COC), apan kini gi-cancelar sa Commission on Elections (COMELEC). Ang pangutana kon balido ba ang iyang COC miabot sa Supreme Court. Meanwhile, midaog gihapon siya sa 2019.

Close fight ning maong kaso. Walo batok unom (8-6). Posible pang mabali human sa Motion for Reconsideration. Wala pa nuon ang teksto sa kompletong desisyon, busa wa pa ta kahibaw giunsa pagrason sa mayoriya sa Korte Suprema nganong pwede molansar pagbalik si Gob. Tallado sa 2019 elections, nga napili man siya sa 2010, 2013, ug 2016, ug ang Konstitusyon ug Local Government Code klaro man nga tulo lamang gayod ka consecutive terms sa samang posisyon ang usa ka elected official. Ang lis mota ning maong kaso ang interpretasyon sa suspension ug dismissal gikan sa Ombudsman.

Apan alang kanako, dangerous precedent ning maong kaso, kay maghimo kinig loophole aron magpadayon paglingkod sa gahom ang usa ka elected official: sa hapit na mahurot ang ikatulo niyang termino, may mo-file kaniya og kaso nga makasuspenso og usa ka buwan, ug kay “interruption” man kana, pwede pa siya mo-file alang sa sunod election.

Ato ning bantayan nga kaso ug paabota ninyo ang update niini dinhi niining atong lindog.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.