Brigada Balaod

Pagpaila

Note: This was the maiden article of my daily Brigada Balaod column published by the Brigada Newspaper Visayas Edition.

Kini ang unang pagkapatik ko dinhi sa Brigada Newspaper Visayas Edition. Haom tingali nga sugdan ko kining akong lindog sa pagpaila alang niadtong wala pa makabantay sa akong ngalan. Ako usab nga panghinaot nga sundan ninyo kining akong lindog, kay akong paninguhaon nga matag adlaw makahatag ko ninyog gamayng kahibalo bahin sa balaod.

Ang una untang plano niini nga question-and-answer format ni siya, sama sa ubang legal advice columns. Ang disbentaha man god sa maong pormat dako kaayo ang makaon nga espasyo para lang mapaabot ang gamayng kahibalo. Himoan pag scenario aron mapaabot ngadto sa bumabasa ang punto nga gustong ipaabot. Maong ako gisugyot sa mga tagdumala nga imbes question-and-answer format, diretso na lang gyod nga narrative sama niini.

Lapas na ko sa lima ka tuig nga nangabogar. Niadtong 2013, migradwar ko sa kursong abogasiya ug mikuha gilayon sa bar. Sa kalooy sa Ginoo, usa ra gyod ka take ug mipasar dayon. Nagtrabaho ko sa usa ka non-governmental organization (NGO) samtang gi-allow pod mi nga mag-private practice. Niadtong 2016, kompletong mi-resign ko sa akong gitrabahoan aron makapokus sa private practice. Sa kasamtangan, usa ko sa mga partner sa Mendoza Lee Isles Mendoza Law Offices nga ang opisina naa mahimutang duol sa Kapitolyo.

Ang akong katuyoan sa paghangyo sa pamunoan sa Brigada Newspaper nga tagaan kog espasyo dinhi mao ang paghatod ngadto sa publiko og ginagmayng mga kahibalo bahin sa lain-laing aspeto sa balaod. Magtutudlo man god ako sa wala pa mahingpit nga abogado, ug kalipay ko nga makapaambit sa mga kasayoran nga hinaot usab unta mapuslan sa atong mga bumabasa.

Ang kahibalo sa balaod gikinahanglan sa matag lungsoranon, kay walay aspeto sa atong kinabuhi karon nga walay balaod, desisyon sa korte, o regulasyon sa mga ahensiya sa kagamhanan nga nagdumala. Gikan sa imong pagkatawo ngadto sa imong kamatayon, sa imong pagmata hangtod sa pagkatulog, may mga balaod ug regulasyon nga angay sundon. Gani, bisan kaming mga abogado matag adlaw pa gihapong magtuon ug magdukiduki, kay duna man gyoy bag-ong makat-onan tungod usab sa kadako sa langyab sa balaod. Unya ang pagka ignorante sa balaod, dili baya mahimong irason nganong wala kini nato sunda.

Busa gidapit ko kamo sa pagpalit matag adlaw niining Brigada Newspaper ug pagbasa sa mga lindog ug artikulo dinhi, labi na gayod kining atong Brigada Balaod. Akong paninguhaon nga ang matag artikulo ning atong lindog mabungahon ug makatabang kaninyo sa dugang pagsabot sa mga balaod sa atong nasod.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.