Tambagi Ko Torney

Mipirma sa annulment; apelyido sa gimabdos; papun-an ang sustento

Maayong hapon. Kasado mi sa akong asawa ug naa mi usa ka anak nga lalaki nga naa niya karon. Naa na siyay ka-live in nga foreigner. Ang maong foreigner maoy naggasto sa annulment. Gipapirma ra ko og kasabotan nga ianular ang among kasal. Unsaon pagkahibalo nga OK na to? Taudtaod na man pod. Salamat.

Ang labing dali nga paagi alang kanimo mao ang pagkuhag NSO/PSA nga Certificate of No Marriage (CENOMAR) o Marriage Advisory. Tan-awa didto kon gi-annotate na ba nga gideklara nga annuled ang inyong kaminyoon basi sa sugo sa korte. Kon wala pa, dili pa pod to makaminyo ang imong asawa og lain. Sa tinuoray lang, dili gayod unta tugtan sa korte nga maanular ang kaminyoon pinaagi lang sa sabot-sabot sa mga partido. Kini klaro kaayo sa Artikulo 48 sa atong Family Code nga nagkanayon nga sa tanang kaso sa annulment, momando ang korte sa piskal nga mag-imbestiga kon wala ba magsabot-sabot ang mga partido. Apan kon nalusot na ang desisyon sa korte, bisan pa kon sayop kini, mao na kini ang desisyon.

xxx

Maayong hapon. Naa lang unta koy pangutana. Mabdos ko karon. Ganahan nako ma-retain ang akong apelyido sa ako anak ug ganahan pod ko madala ang apelyido sa akong partner. Pananglitan Attorney, CRUZ-DELOS REYES. Ang akong apelyido CRUZ. Ang apelyido sa akong partner DELOS REYES. Ang akong pangutana Attorney, kinahanglan ba na og abogado aron “CRUZ-DELOS REYES” ang madala sa akong anak puhon? Salamat.

Samtang gitagaan mo sa balaod og katungod nga mopili sa first name sa inyong anak, Kon unsay iyang apelyido di ninyo pwede sabotan. Kon minyo mo, ang apelyido gyod sa bana ang dad-on sa bata. Kon dili mo minyo ug wala pod niya ilha ang bata, ang imo gyong apelyido ang dad-on sa bata. Kon dili mo minyo ug iyang giila ang bata pinaagi sa pagpirma sa luyo sa Certificate of Live Birth, ang iyang apelyido ang dalhon sa bata. Kon dili mo minyo ug iyang giila ang bata sa laing paagi (dili sa pagpirma sa luyo sa Certificate of Live Birth), mahimo niyang ipausab ang apelyido sa bata ngadto sa iyang apelyido. Kon illegitimate ang bata, giila sa korte nga may katungod ang bata mopili sa gusto niyang gamiton nga apelyido (ig-abot sa tukmang panahon). Ang inyong gihunahuna nga “CRUZ-DELOS REYES” nga apelyido sa bata imposible gyod sa atong balaod karon.

xxx

Maayong hapon. Mangutana lang unta ko Kon may katungod ba ang akong anak nga mangayo og puno nga sustento gikan sa iyang amahan? Niadtong gamay pa siya hangtod karon, P3,500.00 kada bulan ra gyoy sustento sa iya. Kulang na gyod kaayo Attorney. Salamat.

Mahimo kaayo kang mangayo og umento sa sustento. Kon pila ang sustento wa gyoy gibutang sa balaod nga pormula o equation. Apan ang kita sa gipangayoan og sustento, Kon pila ka buok ang iyang angay sustentohan, ang panginahanglan sa nangayo og sustento, ug uban pang mga factor ikonsidera sa korte Kon pila gyoy hustong ihatag sa nangaya og sustento. Kon ang ubang factors mao ra gyapon, gawas na lamang sa panginahanglan sa inyong bata, angayan nga mohatag ang amahan og mas dakong sustento para sa bata.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.