Tambagi Ko Torney

Bahin sa mga anak sa yuta; mga sugilanon sa pagpanapaw

Attorney, sa dihang buhi pa ang among inahan, nakapalit sila sa among amahan og usa ka ektaryang yuta. Minyo na sila pagkapalit nila niadtong yutaa. Namatay ang among inahan pipila ka tuig na ang nakalabay Attorney. Karon kay gusto ang among amahan nga ibaligya ang yuta, apan dili siya mohatag namog bahin kay iya lamang daw kadto kay sila ra man si Mama ang nagpundar ato. Upat mi ka buok magsoon. Di ba makapangayo man pod mi, Attorney, kay mga anak god mis among inahan? Tambagi ko ‘Torney.

Ang katunga niadtong yutaa adto padulong sa imong amahan, isip tag-iya. Ang pikas katunga, bahinon ninyong upat ka magsoon ug sa inyong amahan (o, naa pa gihapon siyay bahin sa maong katunga). Busa, kay ang usa ka ektarya bali mag 10,000 metro kwadrado, ang imong amahan makaangkon og 6,000 metro kwadrado niini (5,000 metro kwadrado isip tag-iya sa yuta, ug 1,000 metro kwadrado isip bahin niya sa kabtangan sa inyong inahan ug iyang asawa), ug kamong magsoon makadawat og 1,000 metro kwadrado matag usa. Kon iya gyong ibaligya ang yuta ug ang mopalit modawat usab niini bisan may problema ang pagpanag-iya sa inyong amahan niini, mahimo ninyong mabawi ang yuta o ang balor niini kon nabaligya na kini ngadto sa laing tawo nga wala makahibalo sa problema sa pagpanag-iya sa yuta.

xxx

Maayong hapon Sir. Ang akoa amahan milayas sa amoa. Mitapon ngadto sa iyang kabit. Puyde ba ni namong mapasakahan og kaso? Tambagi ko ‘Torney.

Kamo mismo, dili. Ang angay nga kasong ipasaka sa inyong inahan batok ngadto sa inyong amahan mao ang concubinage. Kini man gong concubinage usa ka pribadong krimen, ug mahimong ipasaka niadto lamang personal nga nabiktima, nga mao ang asawa sa bana nga nakigpuyo og laing babaye.

xxx

Maayong hapon Attorney. Ako gihapon ni, kadtong may pangutana kabahin sa amahan nga mitapon ngadto sa kabit. Namatay na man ang among inahan. Dili ba mi makapasaka og kaso, Attorney, isip nagrepresentar sa among inahan? Tambagi ko ‘Torney.

Kon patay na ang imong inahan, nan dili na makalapas sa atong balaod batok sa concubinage ang imong amahan, kay ang concubinage mao man ang pakigpuyo sa usa ka tawong minyo ngadto sa babaye nga dili niya asawa. Niining sitwasyona patay na god ang asawa sa imong amahan (ang imong inahan), busa dili na siya minyo sa mata sa balaod.

xxx

Maayong buntag Attorney. Nangabit ang akong asawa. Naa koy mga hulagway nga kinuha sa usa ka pribadong imbestigador nga klaro kaayo nga misulod sila sa motel Attorney. Mipasaka kog kaso sa piskaliya apan gi-dismiss kay ang kabit ra kunoy akong gisumbong, ang angay kuno lakip ang akong asawa. Apan gihigugma man gyod nako ang akong asawa Attorney. Gusto ko nga magbalik mi. Dili diay puyde nga ang kabit lang ang pasakahan og kaso? Tambagi ko ‘Torney.

Ang balaod nagkanayon nga ang kasong adultery ipasaka batok gayod sa duha, ang babayeng minyo ug ang kabit. Depensa sa kabit nga wala siya kahibalo nga minyo ang babaye, maong puyde nga dili siya makombikto samtang makombikto ang babaye, apan gikinahanglan gayod nga silang duha ang ikiha.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.