Tambagi Ko Torney

Gidugayon sa adoption; sekretong kaminyoon; bahin sa yuta; nakasagpa

Attorney, naa kay ideya kon unsa kadugay mahuman ang adoption? May miingon kanako nga mas dali kuno sa usa ka korte kay sa lain, puyde ba ko makapili og korte asa isang-at ang petisyon, Attorney? Salamat.

Depende na sa daghang factors, lakip na ang gilisdon sa kaso (mas sayon mas dali mahuman; mas sayon kon walay mobabag sa himoong pagsagop ug kini may pagtugot sa bayolohikal nga ginikanan sa bata), ang gidaghanon sa mga kaso sa korte diin nalabay ang petisyon, ubp. Ang pagpresentar sa mga testigo alang sa mosagop, kon ang bista sa kaso matag bulan, mokabat gyod og tuig. Lakip na ang mga di-malikayang pagkadelatar sa kaso tungod sa ubang rason, ang sagad nga gidugayon karon (sa dakbayan ug lalawigan sa Sugbo) mga duha ka tuig. Ang mga lagda nato nagkanayon nga ang petisyon alang sa pagsagop adto isang-at sa Family Court sa dapit diin nagpuyo ang nagpetisyon (ang mosagop). Kon labaw sa usa ang Family Court sa maong dapit, bolahon kini, sa ato pa, di gyod ka kabuot kon asa ni maabot ang imong kaso.

xxx

Attorney, unsa man nang gitawag nga secret marriage? Pila man na ka tuig usa mawalay bili?

Walay secret marriage dinhi sa Pilipinas. Tingali ang gipasabot nimo ang usa ka kasal nga wala gipahibalo sa kadaghanan. Sa ato man gong balaod ang gikinahanglan sa usa ka babaye ug usa ka lalaki nga mopakita sa ilang kaminyoon mao ang pari, huwes, mayor o kinsay nagkasal kanila, ug ang duha ka testigo sa ilang kasal. Mahimong walay labot ang publiko diha sa seremonyas.

xxx

Maayong gabii, Attorney. Kanunay kong nagsunod sa imong kolum sa Bisaya Magasin. Mangutana lang unta ko kabahin sa yuta, Attorney. Ang among kamaguwangan giangkon ang tanang yuta sa among mga ginikanan. Unsa may angay namong buhaton niini Attorney? Taga-Bukidnon mi.

Gikinahanglan gyod mo nga moduol og abogado dinha sa inyong dapit aron magpatabang. Mas makahatag og kompletong tambag ang abogado nga motan-aw gayod sa inyong mga dokumento ug sa mga papeles nga gihuptan usab sa inyong igsoon. Tingali ang himoon unya sa inyong abogado mao ang pagsang-at sa korte og usa ka petisyon aron ma-recover ang yuta.

xxx

Maayong gabii, Attorney. Mangutana lang unta ko nimo. Ako man god nakasagpa og usa ka babaye kay iya mang gibinastosan ang akong inahan. Iya kuno ko nga ikiha Attorney. Mapriso ba ko?

Dakong tsansa nga dili. Base lang sa imong gisulti, morag unjust vexation ray makiha sa imong nasagpan batok nimo. Unya depensa nimo ang pagsulti niyag bati sa imong inahan. Ang akong isugyot unhig kiha/bawsig kiha.

Leave a Reply

Your email address will not be published.

This site uses Akismet to reduce spam. Learn how your comment data is processed.