Tambagi Ko Torney

Adoption; light oral defamation; sustento; clerical error

Maayong adlaw Attorney. Ania ang pangutana: ulitawo, dakog suweldo, 55 anyos na ug wala nay plano nga magminyo pa. Mahimo ba nga mag-adopt ko legally aron naay mahimong heredero sa akong mga kabtangan? Kinsa may ilhong inahan? Mahimo ba nga mag-adopt ang single?

Mahimong mo-adopt ang usa ka tawo nga single. Ang atong balaod sa adoption sulod lamang sa Pilipinas (domestic adoption), R.A. 8552, naghatag katungod ni bisan kinsa nga Pilipino nga naa sa hustong pangedaron (sama nimo), may hustong kapasidad sibil ug legal nga katungod (sa ato pa, wala tangtangi ning maong mga katungod pinaagi sa sugo sa korte), may maayong karakter, wala makombikto sa usa ka kaso nga nagpakita sa pagka-imoral, andam nga moamuma sa mga bata, ug may kapasidad nga mosustento ug mopadako sa bata sa pag-adopt. Kon ang usa ka single nga tawo maoy mo-adopt, walay ilhong inahan ang bata.

xxx

Atty. gikinahanglan ba ang preliminary investigation sa kaso nga light oral defamation? Gitugtan man god sa prosecutor nga moagi usa sa preliminary investigation imbes nga ilargo sa korte ang kaso.

Matod sa atong balaod, gikinahanglan lamang ang preliminary investigation kon ang kaso nga gipasaka may penalty nga pagkabilanggo nga dili momenos sa upat ka tuig, duha ka bulan ug usa ka adlaw. Ang light oral defamation nga gi-define sa Artikulo 358 sa atong Revised Penal Code, may penalty nga pagkabilanggo nga arresto mayor (usa ka bulan ug usa ka adlaw ngadto sa unom ka bulan) o multa nga dili molapas sa 200 pesos. Busa, dili gikinahanglan ang preliminary investigation sa kaso nga light oral defamation. Hinuon, may katungod ang sinumbong nga mangayo og preliminary investigation sulod sa lima ka adlaw human siya nakahibalo sa kaso batok kaniya. Ang prosecutor mahimong mo-grant sa maong hangyo.

xxx

Maayong buntag Attorney. Mangutana lang unta ko. Naa koy kapuyo sulod na sa siyam ka tuig. Naa mi tulo ka anak. Kon magkabulag mi, makapugos ba ko niya paghatag og sustento nako ug sa mga bata?

Sa imo dili, kay dili man ka niya asawa. Sa mga bata, makapugos, kon nakapirma siya sa luyo sa Certificate of Live Birth, pagmatuod nga siyay amahan sa mga bata.

xxx

Maayong hapon Attorney. Ang akong problema kay lalaki ko apan “female” ang naa sa akong birth certificate. Unsay akong mahimo ani Atty?

Ubos sa RA 10172, mahimo mo na kining mapausab pinaagi lamang sa pag-adto sa local civil registrar.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.