Tambagi Ko Torney

Builder in good faith; custody ug support sa illegitimate child

Maayong gabii Attorney. Ang akong problema kabahin aning gipuy-an namo sa akong bana karon. Ang yuta niini kay sa mga ginikanan sa akong bana, apan kami sa akong bana ang naggasto sa pagpundar sa balay. Unya karon kay buot na man sa akong ugangan nga mopahawa mi. Maila ra diay ang balay Attorney sa ingon kasayon kay abi accessory follows the principal man kuno matod sa ilang abogado unya ila man ang yuta?

Kining inyong sitwasyon mao ni gitawag nga builder in good faith. Husto ang abogado sa imong ugangan nga accessory follows the principal. Apan duna poy prinsipyo sa balaod nga gitawag og unjust enrichment. Kon wala kay mga katungod sa balay, unya mahatag ra kini largo ngadto sa imong ugangan tungod lamang kay ila ang yuta, usa kini ka dakong binuang. Ang mga lagda ning maong sitwasyon mao kini: Makapugos kamo sa tag-iya sa yuta nga mopili kon paliton ba niya ang balay o ibaligya niya sa inyo ang yuta. Apan dili kamo mapugos sa pagpalit sa yuta kon kini dako ra kaayo og kantidad kompara sa balay. (Ning maong sitwasyona, magsabot mo sa abang, ug kon dili magkasabot, ang korte maoy pahukmon.) Kon paliton niya ang balay, hangtod dili mo mabayran, may katungod mo nga magpabilin sa balay (right of retention).

xxx

Maayong gabii Attorney. Kon mouli ang amahan sa akong anak ngadto sa Negros diin naa siyay maayong trabaho, madala ba niya ang bata tungod kay wala koy trabaho? Dili mi kasado.

Ang atong balaod tataw kaayo. Ang kustodiya sa bata nga dili legitimate adto gayod sa inahan, gawas na lamang kon but-an sa korte. Kon mopugos ang amahan sa imong anak pagdala sa bata, mahimo siyang pasakahan sa kasong “kidnapping”. Ang angay niyang himoon mao ang pagdangop sa korte aron maiya ang kustodiya sa bata. Samtang dili pa kini mahitabo, anha gayod kanimo ang inyong anak.

xxx

Maayong buntag Atty. Isles. Naa koy anak nga lalaki sa pagka dalaga. Ang akong pangutana, puyde ba ko makapangayo og suporta sa iyang amahan nga minyo naman ang iyang papa karon? Dugay na kaayo siyang wala mosuporta sa bata, mag-otso anyos na ang bata karon.

Kon giila niya ang bata pinaagi sa pagpirma sa recognition sa luyo sa Certificate of Live Birth, mapugos nimo siya sa pagsuporta sa bata. Dili ni mawala nga responsibilidad tungod lamang kay naminyo siya og lain. Hinuon, mas mogamay ang mahatag niya nga suporta alang sa inyong anak kon daghan siyag angay suportahan (sama sa iyang asawa ug iyang mga lehitimong anak). Apan ang iyang kaminyoon dili makapugong nga makapangayo kag suporta alang sa bata. Katong suporta sa bata alang niadtong mga tuig nga wala siya mohatag, dili na ka makapangayo niadto.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.