Tambagi Ko Torney

Art. 34 sa Family Code; AWOL; tua sa abroad ang amahan sa bata; suspendido sa OMB

Maayong hapon Attorney. Unsa ka tinuod nga puyde ra nga dili magkuha og CENOMAR sa NSO kon ubos sa Article 34 sa Family Code?

Ang Article 34 sa Family Code nagkanayon nga kadtong nagpuyo na isip managtiayon sa dili moubos lima ka tuig nga walay bikil sa pagminyo (sa laing pagkasulti, puyde gyod sila magminyo bisan kanus-a niadtong lima ka tuig, wala lang gyod), mahimong mo-execute lamang og affidavit nga magpamatuod sa ingon (sa pagpuyo sulod sa lima ka tuig) ug mahimo na silang makasal nga dili mokuha og marriage license. Ang pagkuhag marriage license gikan sa local civil registrar maoy nagkinahanglan og CENOMAR. Busa kon tinuod gayod nga nagpuyo na sa dili mokubos lima ka tuig, mahimong modiretso na lang sa pagpakasal human sa paghimo sa affidavit nga nagpuyo-puyo mo sulod sa lima ka tuig.

xxx

Dear Atty. Isles, naa koy problema. Usa ako ka trabahante og construction nga Manila-based. Nadisgrasya ko sa akong motor nga service niadtong Oktubre ug wala ko katrabaho sulod sa usa ka bulan kapin kay nagpaayo ko sa akong mga samad. Pagbalik nako wala nako nila patrabaho og balik kay nag-AWOL kuno ko. Mahimo ba nako silang makiha Attorney?

Mahimo kaayo. Matod sa balaod, ang abandonment sa trabaho sa usa ka trabahante angay nga tataw. Kon tarong nga nananghid, angay unta nga pabalikon ra ka nila sa trabaho human ka naalim sa imong mga samad.

xxx

Good PM Attorney. Mangutana lang unta ko. Mabdos ko karon apan wala pa mi makasal sa amahan sa bata. Buot niya nga ang iyang apelyido maoy dalhon sa bata, apan tua siya karon sa gawas og tulo ka tuig ang kontrata. Unsaon ni nako Attorney?

Kon dili mo kahulat nga mobalik siya dinhi sa Pilipinas aron makahimo og Affidavit of Acknowledgment, ipadala na lang kaniya ang Affidavit of Acknowledgment ug panotaryohi sa labing duol nga konsulado sa Pilipinas. Ang maong affidavit angay nga pinetsahan ug nanotoryahan human sa imong pagpanganak. Kining maong affidavit ang imong dalhon sa local civil registrar aron ang imong anak makagamit sa apelyido sa amahan.

xxx

Maayong hapon Attorney. Kon ang usa ka DepEd official gipahamtangan og dismissal order gikan sa Ombudsman, makaanha-anha pa ba siya sa iyang opisina?

Depende unsay giingon sa order. Ang kanang suspension order sa Ombudsman basically pagpaurong ra man gyod na sa sweldo ug trabaho sa gisuspenso nga opisyal o empleyado sa kagamhanan. Technically, puyde ra gyod makaadto-adto sa iyang opisina ang usa ka opisyal o empleyado nga suspendido, apan dili siya makahimo og trabaho (pananglitan, pagpirma og mga papeles) ug dili pod siya masweldohan.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.