Tambagi Ko Torney

Illegitimate child; slander; certificate of live birth

Maayong gabii Attorney. Naa lang unta koy ipangutana. Illegitimate child ko. Sukad duha pa ko ka tuig, nagbulag na ang akong mga ginikanan. Karon nahibaw-an nako ang ngalan sa akong amahan. Akong gi-search sa Facebook ug akong nakita nga tua na siya sa Canada nagpuyo. Ako siyang gi-message apan iya ra ko gi-block. Wala gyod siya makasuporta nako Attorney. Unsay angay nakong buhaton?

Wala nimo gitataw kon gi-recognize ka ba sa imong amahan. Kon giila ka niya pinaagi sa pagpirma diha sa luyo sa Certificate of Live Birth, mahimo kang modangop sa korte ug gamiton tong maong pag-ila aron mapugos siya nga mohatag og suporta kanimo. Kon wala ka ilha, magkinahanglan kag ebidensya nga anak ka niya. Sa pagkatinuod lang, labi na nga tua siya sa gawas sa nasod, gamay kaayo ang tsansa nga ilhon ka niya, bisan pa kon mandoan siya sa korte (di man nato ma-enforce didto ang desisyon sa atong mga korte diri). Mas maayo tingali nga dawaton mo na lamang ang masakit nga kamatuoran nga ang imong amahan walay pagpakabana kanimo. Ayaw na lamang himoa ngadto sa imong mga anak ang gihimo sa imong amahan kanimo.

xxx

Maayong hapon Attorney. Mangayo unta ko og tambag. Ang akong pag-umangkon nga menor de edad nanguha og tsitserya sa tindahan sa among silingan tulo na ka tuig ang milabay. Wala mi sultihi sa among silingan kabahin sa pagpangawat sa among pag-umangkon, apan pwerte na diay niyang panabi ngadto sa uban namong mga silingan. Bag-o lang mi nakahibalo kay may nakaaway ang akong pag-umangkon, unya gitawag siya nga kawatan. Miadto ko sa tag-iya sa tindahan aron mahusay na ang gubot, apan dili siya modawat sa bayad. Puyde ba nako siya mapatawag sa barangay? Salamat.

Mahimo kaayo. Ang gihimo sa imong silingan mao ang krimen nga gitawag sa atong balaod nga “slander” kun “oral defamation” (sinulti nga pagpakaulaw). Ipa-blotter kini sa pulis, ug pangita usab og mga tawo nga andam motestigo nga nakabati sila sa inyong silingan nga nagsulti sa ingon, aron duna kamoy madala sa korte. Tungod kay ubos man sa usa ka tuig ang pagkapriso niini, iagi usa kini sa barangay. Kon dili kamo mahilot didto, pangayo og Certificate to File Action aron madala na nimo sa prosecutor’s office ang maong kaso. Puyde usab nga kihaan og child abuse ang imong silingan kon mapakita nga duna nay saykolohikal nga epekto ang maong pagpangdaot sa iyaha.

xxx

Maayong hapon Attorney. Naa lang koy pangutana kabahin sa Certificate of Live Birth sa akong anak. Ato pa siyang Oktubre gipanganak didto sa amo sa Sindangan, Zamboanga del Norte, apan wa pa gyod ko kahigayog uli didto. Mao nga wa pa gyod siya marehistro. Unsay angay nakong himoon Attorney?

Ingna na lang ang inahan nga iparehistro ang bata. Di man ka kinahanglan moadto. Kon minyo mo sa inahan, dili na man kinahanglan ang pag-ila nimo sa bata kay presumed man na nga imohang anak. Kon dili mo kasado, mahimo ra mang iapas ra nimo unya Affidavit of Acknowledgment.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.