Tambagi Ko Torney

Legitimation ug certificate of live birth

Dear Atty. Isles, naa koy pangutana. Ang among kamagulangan nga igsoon wala magdala sa apelyido sa among amahan kay gipanganak man siya sa wala pa maminyo ang among ginikanan. Unsay paagi ani aron mausab ang iyang apelyido, mapareha sa among amahan ug sa amoa. Lain man god kaayo paminawon nga lahi siyag apelyido sa amo nga magsoon ra man unta mi. Daghang salamat.

Iadto kini nga problema sa local civil registrar sa inyong lungsod. Dunay pil-apan nga affidavit of legitimation ang inyong ginikanan, pagpakita nga na-legitimated ang inyong igsoon tungod sa kaminyoon sa inyong ginikanan. Human niini, mahimo nang mausab ang iyang apelyido ngadto sa apelyido sa inyong amahan.

xxx

Maayong adlaw Atty. Mangutana unta ko kabahin sa Certificate of Live Birth sa akong anak. Ang nakabutang man god didto kay single ko, unya naminyo na mi sa iyang amahan. Unsaon pagpausab sa entry nga single pa ko Attorney?

Dili na na mausab, kay mao man nay tinuod sa panahon nga gipanganak ang bata (wala mo makasal pa sa amahan). Hinuon, butangan ra nag annotation ang Certificate of Live Birth nga legitimated ang bata tungod sa kaminyoon sa mga ginikanan.

xxx

Dear Atty., ang akong pangutana kabahin sa akong kaminyoon sa akong bana. Gikasal mi sa mayor sa lungsod. Ang tuig nga among natawhan gi-tamper kay pulos pa man mi menor de edad niadtong panahona. Kon mokuha ko og NSO sa among kasal kay ang mo-appear ang giusab nga tuig sa among pagkatawo. Unsay paagi aron mahusto ni Attorney?

Ang inyong kaminyoon inbalido kay menor de edad pa man kamo niadtong panahona. Walay bili nga sulayan ninyog usab ang entry of birth ninyo sa inyong rekord sa kasal, kay wala man gyoy balido nga kasal nga nahitabo niadtong panahona. Kon buot nimo nga makasal gyod kamo sa imong bana, pagpakasal kamo pag-usab, ug kato na maoy balido ninyo nga petsa sa pagpakasal.

xxx

Dear Atty. Isles, good day to you. Mangutana unta ko unsay angay nako buhaton kabahin sa akong Certificate of Live Birth. Ang akong ngalan Caroline, apan inigkuha nako og NSO kay Carolne man. Masango ko ani inigkuha nako og passport. Hinaot unta nga matabangan ko nimo.

Adtoa ang local civil registrar sa inyong dapit ug ipausab ang imong CAROLNE ngadto sa CAROLINE, kay klaro man nga nasulod kini sa clerical error law. Human niini, ipa-endorse ang imong updated nga Certificate of Live Birth ngadto sa NSO aron inigkuha nimog NSO-authenticated nga live birth, ang updated na nga certificate ang makuha.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.