Tambagi Ko Torney

Nakapalit og yuta; sustento; gusto dalhon sa bata ang apelyido; clerical error

Dear Atty. Naa koy problema kabahin sa yuta. Napalit ni nako niadto pang 2009, apan ang karaang tag-iya pa sa yuta ang nagbuhis hangtod karon. Unsay angay buhaton nako Attorney aron ako na ang magbuhis niini ug manag-iya sa yuta?

Ang pagpalit/baligya sa yuta usa sa mga transaksyon nga ang atong balaod nagmandar nga ipakita diha sa usa ka sinulatan. Dili ni mahimo nga pinaagi lang sa sinultihay. Kon wala kay gikuptan nga papeles, ingna ang karaang tag-iya nga maghimo kamog papeles sa pagbaligya sa yuta, ug panotaryohi kini. Human nimo kini mapanotaryohan, dad-a ang maong papeles ug ang deklarasyon sa yuta ngadto sa Register of Deeds sa inyong lalawigan o dakbayan. Unya moadto ka usab sa assessor’s office aron malutsan ka og bag-ong deklarasyon. Hinumdomi nga ang deklarasyon sa buhis timaan lamang nga ikaw ang naghupot sa yuta, apan dili ang tag-iya niini.

xxx

Maayong hapon Attorney Vince. Naa koy problema kabahin sa akong bana nga si Ricardo. Kasado mi, apan pito pa lamang ka tuig ang among anak, mibiya na si Ricardo sa among balay. Karon 12 anyos na ang bata. Wala gyoy sustento nga naggikan ni Ricardo sukad siya mibiya sa balay, kay pulos na man lang bisyo ang iyang giatubang. Gani karon naa na siyay laing babaye ug may anak na sila sa iyang kabit. Ako ra gyod ang naggasto sa among anak. Unsa may angay nakong buhaton aron mosuporta siya sa akong anak?

Sulayi usa sa pakig-estorya. Adto sa barangay aron mangayo og tabang. Kon dili mahilot didto, duol sa DSWD. Kon dili pa gyod mo magkasabot sa DSWD, angay ka na nga moduol og abogado nga motabang nimo pag-andam og demand letter, ug kon dili pa gyod mokihol sa demand letter, mahimo nang kihaon og sibil (petisyon alang sa suporta) o kriminal (paglapas sa R.A. 7610 kun Child Abuse Law o sa R.A. 9262 kun Anti-Violence Against Women and Their Children Act).

xxx

Attorney maayong buntag. Naa koy anak nga ang apelyido pagparehistro iya sa inahan. Buot unta nako nga ang akong apelyido maoy dad-on sa bata. Mahimo ba kana Attorney?

Duol sa local civil registrar sa inyong dapit ug paghimo sa affidavit of acknowledgment. Human sa pag-acknowledge mo sa bata, ang imo nang apelyido maoy dalhon niini.

xxx

Attorney, naa koy dako kaayong problema. Ang akong ngalan Gracia apan ang nakabutang sa akong Certificate of Live Birth ug NSO Gracie. Unya ang akong mga school record ug baptismal Gracia man, unya mao na usab kini ang akong gigamit. Puyde ba mausab ngadto sa Gracia ang akong Certificate of Live Birth ug NSO Attorney?

Mahimo man kon moadto ka sa local civil registrar ug makombinser nimo ang civil registrar nga clerical error lamang ang pag-usab gikan sa Gracie ngadto sa Gracia. Kon dili mosugot ang civil registrar, mahimong mopasaka ka sa korte og kaso aron mapugos ang LCR pag-usab sa imong ngalan sa ilang records. Apan sa praktikal nga pagkasulti, mas dali nga ang imo na lamang mga school record ang imong ipausab. Ang baptismal walay labot ang kagamhanan.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.