Tambagi Ko Torney

Inheritance; bigamy ug adultery; sustento; DNA test

Maayong hapon Attorney. Ang akong uyoan (igsoon sa akong amahan) may duha ka anak nga pulos babaye. Naminyo ang iyang mga anak apan wala gayod makaapo ang akong uyoan, hangtod namatay na lamang siya. Unya namatay na pod ang usa sa akong mga ig-agaw. Ang yuta nga kanhi sa akong uyoan karon nga bahin unta sa namatay nako nga ig-agaw ang mga pag-umangkon na man hinuon sa iyang bana ang nagtikad. Husto ba god ni Attorney? Dili ba ko maka-claim sa yuta, ingon tang ig-agaw ko sa namatay?

Sa pagkamatay sa imong uyoan, ang iyang kabtangan (lakip na ang yuta) nabahin ngadto sa iyang mga anak. Pagkamatay sa imong ig-agaw, ang katunga sa iyang kabtangan maadto sa iyang bana ug ang katunga adto sa iyang igsoon (ang ig-agaw nimo nga buhi pa). Busa ang imong ig-agaw nga buhi pa ang may katungod nga mo-claim sa katunga sa kabtangan (dili lang sa yuta). Unfortunately, wala kay katungod sa yuta kay layo ra kaayo ka nga paryente sa namatay.

xxx

Maayong gabii Attorney Vince. Puyde mangutana? Unsay silot sa tawo nga masakpan sa bigamy ug adultery?

Ang bigamya mahimo sa usa ka tawo nga magminyo bisan minyo pa siya sa lain. Dili depensa nga imbalido ang nag-unang kaminyoon kay wala may katungod ang managtiayon nga modeklara sa ilang kaminyoon nga imbalido. Ang korte lamang ang makahimo sa ingon. Ang bigamya may silot nga prision mayor, kon pagkapriso gikan sa unom ka tuig ug usa ka adlaw ngadto sa 12 ka tuig. Mahimong mapasakaan og bigamya ang bana ug ang asawa. Sa laing bahin, ang adulteryo mahimo lamang sa usa ka asawa. Kini ang pakighilawas sa laing tawo gawas sa iyang bana sa usa ka babayeng minyo. Ang matag akto sa pakighilawas usa ka ihap sa adulteryo. Kini gisilotan sa prision correccional medium and maximum, kon pagkapriso gikan sa duha ka tuig, upat ka bulan ug usa ka adlaw ngadto sa unom ka tuig.

xxx

Maayong udto Attorney. Puyde ra paylan og kaso bisan mohatag pa og sustento ang amahan sa bata? Iyang giila ang bata diha sa certificate of live birth, apan dili mi kasado. Salamat Attorney.

Mahimong makakiha og kasong kriminal o sibil sa dili paghatag og sustento, o bisan gani mohatag og sustento, apan sa tan-aw sa inahan o guardian sa bata, dili husto ang gihatag nga sustento. Kon pila ang sustento magdepende sa daghang factors, lakip na ang aktuwal nga panginahanglan sa bata, ang kapabilidad sa gipangayoan og sustento sa paghatag (lakip na ang posibilidad nga may uban pod siyang gisustentohan), ubp. Busa, kon mihatag og sustento, mahimong depensa sa akusado nga mihatag siya, bisan gamay, kay mao ra usay iyang mahimo. Angay hinumdoman nga ang balaod wala magpugos sa usa ka butang nga imposible. Apan kon unsa ang imposible magdepende sa partikular nga kaso.

xxx

Maayong buntag Attorney. Ang DNA test madawat ba isip ebidensiya nga ang usa ka lalaki maoy amahan sa usa ka bata? Pila man poy bayad sa DNA test Attorney? Salamat.

Ang negatibo nga resulta sa DNA test konklusibo (dili makuwestiyon) nga ebidensiya nga dili anak sa giingong amahan ang bata. Apan ang positibo nga resulta sa DNA test makuwestiyon nga ebidensiya nga anak gayod sa giingong amahan ang bata. Sa laing pagkasulti, magkinahanglan kag laing ebidensiya, ug dili igo ang DNA test lamang. Kini maoy giingon sa Korte Suprema sa kaso nga Herrera v. Alba, G.R. No. 148220, Hunyo 15, 2005. Sa kaso nga Lucas v. Lucas, G.R. No. 190710, Hunyo 6, 2011, miingon usab ang labawng hukmanan nga dili katungod sa miingong anak ang pagpugos sa gipasinganlang amahan nga mopaubos kini sa usa ka DNA testing. Wala ta makaseguro, apan may nakaingon nato nga ang NBI mohimo sa DNA testing sa bayad nga P60,000.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.