Tambagi Ko Torney

Annulment; sustento gikan sa lalaking minyo; child abuse; Christmas bonus; simulation of birth

Sir maayong gabii. Mahimo bang magpaanular mi sa among kasal sa akong asawa? Lima na mi ka tuig kasado, unya naay mga anak nga tulo ug usa ka tuig. Ang among lalisan kabahin sa kwarta kay sige siyag pangutang unya wa mi ikabayad. Salamat Sir.

Kon duna moy mga rason nga maanular ang inyong kaminyoon, mahimo. Apan ang sige ninyong lalis kabahin sa kwarta dili man na igong rason aron maanular ang inyong kaminyoon. Pakigkita personal og abogado aron mapangutana ka sa husto ug mahibaw-an ang tanang sirkumstansiya nga mahimong magamit aron maanular ang inyong kasal.

xxx

Attorney, ang amahan sa akong gisabak minyo sa laing babaye. Makapangayo ba ko niyag sustento alang sa bata nga minyo man siya? Unsaon man nako kon magmagahi siya kay masuko kuno ang iyang asawa?

Inigpanganak unya nimo, seguroha nga makapirma siya sa acknowledgment sa bata diha sa luyo sa Certificate of Live Birth. Kon dili niya kini mapirmahan, maglisod ka sa pagpangayo kay wala man kay kamatuoran nga iyang anak ang bata. Bisan kon minyo siya sa lain, obligado siya nga mohatag og sustento sa iyang mga anak-sa-gawas. Kon magmagahi siya tungod kay masuko kuno ang iyang asawa, gikinahanglan kang modangop sa korte aron ang korte na ang momando kaniya.

xxx

Maayong buntag. May igsoon ko nga may anak duha ka babaye. Namatay ang iyang bana ug naminyo siya og lain. Ang nakaapan, Attorney, kay kusog mangulata ang ilang ama-ama. Makasumbong ba ko sa pulis bahin niini nga iyaan ra man ko?

Mahimo ka kaayong makasumbong. Ang pagpanagmal sa kabataan usa ka krimen, ug mahimong makasumbong ang si bisan kinsa kon duna silay kasayoran sa usa ka krimen. Duola lang ang Women and Children Protection Desk (WCPD) sa inyong estasyonan sa pulis aron mahimoan nila kini og tukmang lakang.

xxx

Maayong hapon, Attorney. Nagtrabaho ko sa usa ka kompanya sa konstruksyon ug mag-upat na ko ka tuig ning maong trabaho, apan wala gyod ko kadawat og bonus inig Pasko. Dili diay covered sa Christmas bonus ang konstruksyon, Attorney?

Walay balaod nga nagmando sa mga kompanya paghatag og Christmas bonus sa ilang mga trabahante. Basin ang imong gipasabot ang 13th month pay nga gimando sa balaod. Kini angayng madawatan sa usa ka trabahante nga nakatrabaho bisan usa lang ka buwan sulod sa tuig. Bisan 13th month pay ang tawag niini, angayng hinumdoman nga mahimo nga dili ni siya sama kadako sa usa ka binuwan nga sweldo; ang pagkompyut niini ingon niini: sumatotal sa nadawat nga sweldo sulod sa tuig / 12.

xxx

Attorney, di ba mas dali nga imbes moadto mi sa korte ug maghago-hago sa pagsang-at og kaso sa adoption, amo na lang ipagawas sa birth certificate nga ang bata anak sa magtiayon nga buot mosagop kaniya?

Mas dali, apan ilegal man na. Usa kana ka krimen nga gitawag og simulation of birth. Gisilotan kini ubos sa Artikulo 347 sa Kodigo Penal ug Seksiyon 21(b) sa Domestic Adoption Act.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.