Tambagi Ko Torney

Gibiyaan sa bana; waiver; sustento gikan sa wa magpakita nga bana; filing fee sa criminal case; di makigminyo

Maayong hapon, Attorney. Mangutana lang ko. May bana ko apan dugay na ko niya nga gibiyaan. Pila man ka tuig sukad sa iyang pagbiya aron makaminyo ko pag-usab?

Bisag pila pa katuig mo nagbuwag, minyo pa gihapon mo sa mata sa balaod, gawas na lamang kon mopetisyon ka sa korte nga ang imong bana ideklara nga presumptively dead alang sa katuyoan nga ikaw makaminyo pag-usab. Aron makapadeklara sa kapikas nga presumptively dead, gikinahanglan nga ang kapikas wa na igkita sulod sa upat ka tuig (o duha ka tuig kon nawala tungod sa pagkalunod sa barko, pagkahagsa sa abyon, pag-apil sa gubat, o uban pang sirkumstansya nga anaa sa kakuyaw sa kamatayon) ug ang mi-file sa petisyon may well-founded belief nga ang iyang kapikas patay na. Kining maong well-founded belief mapakita pinaagi sa panukit-sukit sa mi-file sa petisyon kabahin sa iyang kapikas kon buhi pa ba kini o patay na.

xxx

Attorney, tinuod ba nga kon pirmahan sa ginikanan ang waiver alang sa usa ka field trip unya dunay aksidente nga mahitabo wala nay tulubagon ang tulunghaan?

Dili sa tanang panahon. Gikinahanglan gihapon nga ang magtutudlo ug ang ubang mga opisyal sa tulunghaan magmatngon alang sa kaayohan sa ilang mga estudyante. Ang pag-waive sa tulubagon tungod sa negligence dili balido kay gidili sa balaod (Artikulo 6 sa Kodigo Sibil). Sa laing pagkasulti, ang magtutudlo o staff sa eskuylahan pwede pa gihapong mapanubag bisan kon mipirma ang mga ginikanan og waiver basta wala niya matuman ang gipangayong pagmatngon (required diligence) ubos sa balaod.

xxx

Maayong udto, Attorney. Gikinahanglan nako ang imong tambag. Lima na ka tuig sukad mibiya kanamo ang akong bana. Duha ang among anak, ang maguwang sayes anyos ug ang manghod singko anyos. Wa na gyod nako siya makontak. May nakaingon nako nga nakit-an kuno niya ang akong bana sa usa ka kompanya sa Makati, apan wala pod nako maberipika kay wala man koy pamlite padulong Manila. Mahimo ba kong makapangayo og sustento kaniya?

Mahimo man, apan angay nimong mahibaw-an asa siya nagpuyo o nagtrabaho, kay adto nato ipadala ang demand letter alang sa pagpangayo og sustento. Kon dili siya motubag sa demand letter, mahimo nimong isang-at ang kaso sa korte aron sugoon siya sa korte sa paghatag kanimo og sustento. Apan angayang gihapon kang makahibalo kon asa siya nagpuyo o nagtrabaho, aron adto ipadala sa korte ang mga sugo kaniya lakip na ang sa pagtubag sa kaso.

xxx

Maayong hapon! Mangutana lang ko, pila man ang bayad kon mosang-at og kasong kriminal?

Wala may bayad ang pagsang-at og kasong kriminal, apan kon mokuha kag kaugalingong abogado aron may makatabang kanimo sa pagpreparar sa gikinahanglang mga dokumento, makagasto ka kay mobayad ka man sa abogado.

xxx

Maayong hapon Sir. Naa unta koy pangutana. Nakapamabdos ko sa akong uyab, apan dili pa ko andam makigminyo niya. Puyde ba nga sustento lang usa sa bata ang akong ihatag?

Mahimo kaayo. Dili man ka mapugos niya sa pagpakasal kaniya. Apan angayan nga mohatag kag sustento sa bata kay imo man nang anak.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.