Tambagi Ko Torney

13th month pay; KBP Broadcast Code; sustento sa anak sa kabit; filing fee sa kasong kriminal; grocery imbes kwarta isip sustento

Attorney, mi-resign ko effective niadtong Hunyo 30, 2014. Apan giingnan ko sa HR sa akong gitrabahoan sa una nga unya pa daw sa Disyembre 24, 2014 nako makuha ang katunga sa ako 13th month pay. Husto ba god ni Attorney?

Ang P.D. 851 nga maoy balaod nga nagmandar sa 13th month pay miingon lamang nga angay ning ihatag sa dili pa molapas ang Disyembre 24. Dili ka kapugos sa HR sa imong gitrabahoan kanhi nga bayaran ka sa pro-rated nimo nga 13th month pay inig-resign nimo. Apan dili sab sila kapugos nimo nga mopirma sa quitclaim and waiver sa di pa nila mabayran ang pro-rated nga 13th month pay. Mao niy hinungdan nganong sagad sa mga kompaniya mobayad sa mi-resign nga empleyado sulod sa usa ka buwan sukad sa pag-resign sa pro-rated nga 13th month pay kay buot man pod nila nga makakuha nag quitclaim and waiver gikan sa empleyado.

xxx

Puyde ba magsibya sa radyo nga walay ID sa KBP?

Sumala sa Broadcast Code of the Philippines nga gipagawas sa Kapisanan ng mga Brodkaster ng Pilipinas (KBP) niadtong 2007, ang mga tawo nga regular nga magsibya, ingon man mga tigsulat sa balita, mga tigsulat sa drama, mga editor ug mga direktor kang kinsang trabaho naglakip sa pagprodyus og mga materyal nga isibya gikinahanglan nga dunay akreditasyon gikan sa KBP. Ang estasyon dili mopasibya sa usa ka tawo nga walay akreditasyon sa KBP. Ang paghimo sa ingon (gipasagdan nga makasibya ang usa ka tawo nga walay akreditasyon gikan sa KBP) usa ka grave offense sumala sa Broadcast Code.

xxx

Bag-o lang ko nakahibawo, Attorney, nga duna diay kabit ang akong bana. Gani, may duha sila ka anak. Ang kabit sa akong bana isog kaayo nga miadto sa amo kay lagi kuno obligado ang akong bana nga mosustento sa ilang mga anak. Makapugos ba siya sa akong bana nga mohatag og sustento sa ilang mga anak?

O, kay siya man kahay amahan sa maong mga bata. Sumala sa Artikulo 195 sa Family Code, bisan ang mga anak-sa-gawas makapangayo og suporta gikan sa ilang ginikanan. Hinuon, kon wa niya angkona kining mga bataa, mapugos usa ang inahan sa pag-adto sa korte aron ipaangkon sa imong bana ang mga paternity sa mga bata.

xxx

Attorney, naligsan ang akong uyoan ug namatay. Buot unta ming mokiha sa nakaligis niya, pero giingnan mi sa pulis nga dako kuno mig mabayran sa pag-file sa kaso ngadto sa prosecutor’s office. Tinuod ba ni Attorney?

Wa may bayad ang pag-file og kasong kriminal. Pagpatabang lang mo sa pulis pagpreparar sa reklamo ug sa pagsang-at niini.

xxx

Akong napamabdosan ang akong uyab sa una ug karon mag-7 anyos na ang bata. Sukad pa sa una, nagsustentohan nako sa bata, apan dili kwarta ang akong ihatag, kon dili mga grocery items, sama sa gatas, bugas, tubig, ubp., ingon man sinina. Nagsigeg pang-harass kanako ang inahan sa bata kay buot niya nga ang balig P3,000 nga grocery nga ako ihatod sa ilaha matag buwan pun-an nakog P2,000 nga kwarta. Kay naa man ko sa DepEd nagtrabaho, iya kunong sulatan ang division superintendent aron masuspenso ko. Masuspenso kaha ko Attorney? Makapugos ba siya nako nga kwarta inay grocery ang akong ipadala isip sustento?

Kon masuspenso ba ka o dili, magdepende kon resonable ba ang P3,000 nga imong sustento sa bata matag buwan. Ang tukma nga sustento magdepende man sa kita sa ginikanan ug sa panginahanglan sa bata. Posibleng masuspenso ka kon ubos kaayo sa tukma nga sustento ang imong gihatag. Apan dili kapugos ang imong ex nga kwarta imbes nga grocery ang imong ipadala sa bata. Wa man mag-ingon ang balaod nga ang sustento kinahanglang kwarta gyod.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.