Tambagi Ko Torney

Justifying circumstance; theft v. robbery; rape shield rule; involuntary servitude; constructive dismissal

Attorney, maayong hapon. Kon makapusil ang tag-iya sa balay kay nakasulod ang kawatan ug nagkupot na og gamit para dalhon sa gawas, unya namatay ang kawatan sa sulod sa balay, unsay kaso sa tag-iya sa balay nga nakapusil? Lisensiyado ang armas.

Mahimo siyang makiha og homicide o murder ba kaha, apan mahimo niyang depensa ang justifying circumstance sa unlawful aggression ubos sa Artikulo 11(1) sa Revised Penal Code. Ang maong balaod nag-ingon nga walay tulubagong kriminal ang si bisan kinsa nga midepensa sa iyang kaugalingon o sa iyang katungod kon dunay unlawful aggression, ang iyang gigamit sa pagdepensa resonable ra, ug wa siya manguna. Kon mapamatud-an niya kining tulo ka rekisitos adto sa korte, wala siyay tulubagong kriminal.

xxx

Unsay kalainan sa theft ug sa robbery?

Kining theft ug robbery pulos ni pagpangawat sa Binisaya. Ang batakan nga kalainan aning duha mao nga sa robbery dunay paggamit sa kusog ug pagpanghulga, samtang wala kini sa theft. Ang theft gi-define sa Artikulo 308 sa Revised Penal Code samtang ang robbery anaa sa Artikulo 293. Sa Artikulo 308, giila usab nga theft kining mosunod nga mga buhat: di pag-uli sa kinit-an nga butang, pagkuha o paggamit sa mga butang nga gituyo pagguba, ug pagsulod sa usa ka kinoral nga dapit diin gidili ang pagsulod ug pagpangayam/pagpangisda/pangpanguha sa mga prutas o lagutmon didto nga walay pagtugot sa tag-iya.

xxx

Gilugos ko sa among silingan Attorney pero mahadlok ko mosumbong sa mga otoridad kay medyo ubay-ubay na pod kog na-partner sa among mga silingan. Puyde ba niyang gamiton batok nako nga daghan nag na-partner nako?

Dili. Ubos sa Rape Shield Rule nato (Seksiyon 6 sa R.A. 8505 kon “Rape Victim Assistance and Protection Act of 1998”), dili dawaton sa korte ang ebidensiya kabahin sa imong kaaging sekswal gawas na lamang kon kini makita sa korte nga may kalabotan sa kaso.

xxx

Mipirma kog kontrata Attorney nga motrabaho ko sulod sa usa ka tuig. Nakakita kog mas maayo nga oportunidad, ug buot kong moresayn karon. Ang kontrata nag-ingon nga pabayron kog P40,000 kon moresayn ko. Puyde ba ko makabiya sa trabaho?

Puyde, kay di man makapugong nimo ang imong amo nga mobiya ka. Gidili sa atong Batakang Balaod ang involuntary servitude, ug kon pugson ka niya sa pagpatrabaho bisan pag di na ka ganahan, involuntary servitude ni. Apan kinahanglan ka nga mohatag og 30 ka adlaw nga pahibawo sa ila aron makakita silag puli nimo. Wa ko kabasa sa imong kontrata busa di ko kasulti kon makonsiderar ba nga liquidated damages nang P40,000. Kon liquidated damages na, obligado kang mobayad ana. Apan kon dili, mas ubos ang imong mabayran, igo lang sa aktwal nga nagasto nila sa pagpangita ug pag-train og mopuli nimo.

xxx

Attorney, buot kong mo-resign sa akong trabaho, unya kay naa may nakaingon nako nga gikinahanglan kuno ang 30 ka adlaw nga pahibawo, busa misumiter kos akong resignation letter usa ka buwan sa wa pa ko planong mobiya. Unsa ba hinuon Attorney nga pagkaugma wa na man ko pasudla sa guwardiya. Gisweldohan ko nila sa nasudlan na nako nga mga adlaw, apan wa gyod gikan adtong adlawa nga wa nako pasudla hangtod sa petsa sa effectivity sa akong resignation. Sakto ba god na Attorney?

Kadtong wa na ka pasudla, constructive dismissal na to. Ang effectivity sa imong resignation katong petsa nga giingon mo sa imong sulat. Busa, dili unta ka nila angay gipapha sa wala pa to moabot nga petsa. Maka-claim ka og backwages niadtong mga adlaw nga buot unta nimong mosulod apan wa ka pasudla.

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.